أفضل الذكر لا إله إلا الله
لأن أقول سبحان الله و الحمد لله ولا إله إلا الله و الله أكبر أحب إلي مما طلعت عليه الشمس
كلمتان خفيفتان على اللسان ثقيلتان في الميزان حبيبتان إلى الرحمن سبحان الله و بحمده سبحان الله العظيم
اضغط هنا هم دقيقتان فقط



Sunday, April 27, 2008

و الله ما في حد يستاهل

مشهد بيتكرر كتير قوي
في المواصلات
في العملفي التليفون
في البيت
في أماكن كتير جدا
تلاقي اتنين ماسكين ودن بعض و شغالين نم على أي حد
فلان عمل
فلانة خلت
ده فيه كذاو كذا وك
دي بتعمل كيت و كيت و كيت
و تريقة على خلق ربنا
و ألفاظ نابية و كلام بذئ
بجد يا جماعة و الله حاجة تتعب
طب نفسي أعرف ايه وجه الاستفادة
يعني ناهيك عن كمية السيئات اللي بياخدوها
طب بس بيستفيدوا ايه
ايه فايدة الغيبة و النميمة
ده ربنا سبحانه و تعالى بيقول"يا أيها الذين آمنوا اجتنبوا كثيرا من الظنّ إنّ بعض الظنّ إثم ولا تجسسوا ولا يغتب بعضكم بعضا أيحبّ أحدكم أن يأكل لحم أخيه ميتا فكرهتموه وأتقوا الله إن الله توّاب رحيم -الحجرات:12
و قد أبلغنا رسولنا الكريم فقال " لا يدخل الجنة نمام " متفق عليه
يعني مش بس لا يدخلون الجنة
لا و كمان عذاب رهيب في النار
اللي يغيظ بقى ان الواحد لما ينصح حد من دول يقوم يقولك
أنا مش بتبلى عليه الكلام ده فيه فعلا
و كأنهم ما يعرفوش حديث رسولنا الكريم
عن أبي هريرة رضى الله عنه أن رسول الله صلى الله عليه و سلم قال: "أتدرون ما الغيبة؟" قالوا: الله ورسوله أعلم، قال: "ذكرك أخاك بما يكره" قيل: أفرأيت إن كان في أخي ما أقول؟ قال: "إن كان فيه ما تقول فقد اغتبته وإن لم يكن فيه فقد بهته" رواه مسلم
طب و حتى غير كل ده
تعالوا نفكر كده
اللي بيتكلم على حد و بيتريق عليه ده
و عمال يطلع فيه القطط الفطسانة يبقى بيحبه
طبعا لا
لأن مستحيل حد بيجب حد و يتكلم عليه أو يذكر فيه أي شئ وحش
طيب هو اللي بيكره حد ده
أو بلاش بيكرهه
اللي مش بيحب حد يهاديه بأغلى حاجة عنده
بحسناته
عن أبي هريرة رضي الله عنه أن رسول الله صلى الله عليه و سلم قال: "أتدرون من المفلس؟ قالوا: المفلس فينا من لا درهم له ولا متاع؟ فقال: إن المفلس من أمتي يأتي يوم القيامة بصلاة وصيام وزكاة، ويأتي قد شتم هذا، وأكل مال هذا، وسفك دم هذا، وضرب هذا، فيعطي هذا من حسناته، وهذا من حسناته، فإن فنيت حسناته قبل أن يقضي ما عليه، أخذ من خطاياهم فطرحت عليه، ثم طرح في النار"رواه مسلم
يعني ده الواحد لو بيعشق حد جدا و بيحبه لدرجة الجنون
مش هيقبل انه يعطيه حسناته و ياخد سيئاته
فما بالكم بقى لو حد مش بتحبه
هتقبل تديله حسناتك و تاخد سيئاته
لو فكرنا كويس هنلاقي إن
و الله ما في حد في الدنيا يستاهل إننا نقلل حسناتنا و نزود سيئاتنا عشانه

Tuesday, April 22, 2008

حكمة

أهوى الصعاب و أُعْرَف بأني
لا أؤمن أبدا بالمحال
لكن هذي الحياة علمتني
ليس كل ما يُطْلَب يُنَال
إن كان ما أَرَدْتُهُ خير
سيجعله الله سهل المنال
و إن عَلِمَ أنه لي شر
فمصيره من طريقي الزوال

Tuesday, April 15, 2008

تاج عرفنا بنفسك

التاج ده و صلني برده من منى الشوربجي مدونة عصارة الحياة
و لتاني مرة آسفة على التأخير عشان نفس السبب
النت كان فاصل كالعادة
نبدأالإجابة بقى

لو أعطيتك ثلاث وردات .. من هم الثلاث الأشخاص اللى هتهديهم الورد اللي معاك؟؟
ثلاث وردات بس
ماشي
الأولى لأجمل أم في الدنيا أمي الحبيبة
و الثانية لأجمل صديقة و أخت في الدنيا
و الثالثة هحتفظ بيها للمستقبل

لو أعطيتك ورقة بيها 3 سطور فقط و قلت لك أكتب فيهم اللى أنت عيزه هتكتب إيه ؟؟
اللهم اجعل أعمالي كلها صالحة و لوجهك خالصة و انفع بها الإسلام و المسلمين
اللهم اجمعني و من أحببتهم فيك على حبك في الدنيا و الآخرة
اللهم ارزقني حسن الخاتمة

ما هو هدفك فى الحياة ؟؟
هدفي في الحياة هو أن أكون نافعة لديني في أي مكان أكن فيه
بمعنى
في العمل أن يوفقني الله لعمل بحث علمي جيد يساهم في إعادة المسلمين لمكانتهم العلمية المرموقة و أن أساهم في تصحيح تفكير شباب المسلمين و وضعهم على الطريق الصحيح
و إن قدر الله أن أتزوج و رزقني بالذرية فهدفي أن أربيهم تربية إسلامية صحيحة على هدف حتى ينفع الله بهم الإسلام
إن شاء الله بكرة هيكون أحسن من النهارده"هل تصدق هذه المقولة ؟؟ و لماذا ؟؟
أيوه أصدقها
ده أنا كمان مصدقة إن أي يوم يعدي على الإنسان المؤمن كله خير مهما كان فيه من صعوبات أو آلام
عارفة ليه
لأن الإنسان المؤمن عارف كويس جدا إن أمر المؤمن كله خير إذا أصابته سراء شكر فكان خير له و إذا أصابته ضراء صبر فكان خير له

أجمل مقولة سمعتها / سمعتيها فى حياتك ؟؟
نحن قوم أعزنا الله بالإسلام فإذا ابتغينا العزة بغيره أذلنا الله
فاروق الأمة عمر بن الخطاب

من المغنى اللى بتحبه أوى و إيه أحلى أغنية ليه بتحبها ؟؟
و الله هو أنا بطلت أسمع أغاني من زمان
بس كنت بحب أسمع كاظم الساهر و أكتر أغنية كنت بحبها ليه اسمها حديث النفس
أما دلوقتي بحب أسمع أناشيد و أكتر واحد بحب أسمعله
هم الحقيقة اتنين مش واحد
مشاري راشد و بحب قوي ليه نشيد أغيب و ذو اللطائف لا يغيب
و موسى مصطفى و بحب ليه قوي نشيد في كل يوم
غزة تمثل لك إيه فى حياتك ؟؟
غزة و كل شبر مسلم محتل يمثلون لي رمز الصمود و التضحية
يمثلون كرامتنا الضائعة
أعطى لإنتمائك لوطنك درجة من مائة ؟؟
100

لو تزوجت / تزوجتى و أنجبت بنتين و ولدين أى الأسماء تختار لهم ؟؟
ههههههه
إجابة السؤال ده دايما بتضحك الناس عليا بس ماشي عشان خاطرك بس يا منمن
شوفي يا ستي طول عمري من و أنا صغيرة و انا بحب اسم نور جدا عشان كده كنت دايما أقول إني هسمي ولادي كلهم نور
الأولاد: نور الدين و نور الإسلام
البنات: نور الهدى و نور الإيمان
و هبقى أناديهم نور و إسلام و هدى و إيمان

عمرك غشيت فى أمتحان و انت صغير؟؟
الحمد لله لا

لو أتعرض عليك رشوة كبيرة و انت فى زنقة ماليه هتعمل إيه ؟؟
إن شاء الله بإذن الله لن أقبلها لأن ربنا عمره ما هيبارك في حاجة جت من رشوة
تمرر التاج ده لمين ؟؟
كان نفسي أرجعهولك تاني يا منمن بس سارة سبقتني بقى

هبعته لباقي أصحابي على الميل

Monday, April 7, 2008

تاج العزوبية

التاج ده وصلني من منى الشوربجي مدونة عصارة الحياة
آسفة يا منمن على التأخر في الرد بس النت كان مزهقني

ما رأيك فى الجملة التى تقول ...العزوبية تاج على رؤوس العزاب لا يراه الا المتزوجين ؟؟

هههههههه
أكيد كل حالة ليها عيوبها و ليها مميزاتها بس الزواج هو سنة الحياة و بيقابل فطرة و غريزة في الإنسان
هو الإنسان كده مش بيعجبه حاجة لا العزاب عاجبهم حالهم ولا المتزوجين عاجبهم حالهم

ما هى العوائق من وجهة نظرك التى تحول بين الشباب والزواج هذه الايام ؟؟؟

العوائق كثيرة من ظروف اجتماعية و اقتصادية و سياسية لا تخفى على أحد
من تدني الأخلاق و تفاهة التفكير
من البعد عن الله و التمسك بمظاهر كاذبة ليس لها اي أساس لا في الشرع ولا في الدين

من وجهة نظرك هل النكد موجود فى العزوبيه ام فى الزواج ؟ ولماذا ؟

النكد موجود في كل حته سواء عزوبية أو جواز
اللي بيختلف هو نوع النكد و مصدره
و إذا كان في حاجة تخفف من النكد ده أو لا
يعني متهيألي إن نكد الدنيا كله يروح بمجرد إن الإنسان يشوف أولاده سعداء
أو يشوف شريك حياته سعيد
و ربنا مايجيب نكد لحد أبدا

ما الحل من وجهة نظرك لمشكلة (( العزوبية )) فى مصر ؟؟

و الله أنا شايفة إن حل أي مشكلة في الدنيا هو إننا نرجع لربنا تاني
لا يغير الله ما بقوم حتى يغيروا ما بأنفسهم
يعني لو رجعنا نتمسك بدينا و تعاليمه صح زي زمان أكيد الأوضاع هتتحسن و الحال هيتغير و هنلاقي حل لمعظم المشكلات
و لما يحصل ده
مش هنلاقي أهالي بيغالوا في طلباتهم
ولا هنلاقي شباب مستهتر
ولا حرامية سارقين البلد
ولا بطالة ولا ولا ولا
هنلاقي إن شاء الله كل خير

من وجهة نظرك ....هل للعزوبية مميزات وعيوب ؟؟؟

أكيد طبعا كل شئ في الدنيا له مميزات و عيوب
من المميزات مثلا الحرية إلى حد ما
المسؤلية مش جامدة قوي يعني الواحد شايل مسؤلية نفسه بس
و من العيوب افتقاد مشاركة الآخر في كل شئ
افتقاد وجود شخص تحبه و يحبك
افتقاد عدة معاني مثل الحب و التضحية و المكافحة و انكار الذات
و اكيد طبعا الأولاد

ما هو رأيك فى انشاء مدونة (( رابطة )) للعزاب من المدونين ؟؟؟

و إيه فايدتها أو هدفها
متهيألي مالهاش لازمة

أخيرا ....لمن تمرر هذا التاج ...على الأقل خمسة ؟؟؟
خمسة بحالهم
هبعته لصحابي على الميل

أنا و المطر


أحب المطر بطريقة لا يتصورها بشر
أشعر بسعادة بالغة عندما أسير تحت المطر
لا يهمني هل هو يتساقط برقة أم يهطل بشدة
و في كل مرة أكن فيها مع صديقاتي تحت المطر يَقُمْنَّ بجذبي جبريا لإبعادي عن المطر و يَقُلْنَّ ستصابين ببرد قاتل بسبب جنونك هذاو لكن الغريب أني لم أصب بالبرد و لو مرة واحدة بسبب و قوفي تحت المطر
لا أستخدم المظلة إلا نادرا و ذلك عندما أشعر أن كل من بالشارع ينظرون إلي باستغراب و كأنهم يقولون ما هذه المجنونة
فأقوم بفتح مظلتي مقاومة رغبتي الشديدة في ألا أفتحها
و لأني لست من النوع الذي يهتم لكلام الناس فسرعان ما أطلق لرغبتي العنان و أسارع بإغلاق المظلة مستمتعةً بالسير في المطر
منذ بضعة أسابيع كنت عائدة من العمل و نزلت بعيدا عن منزلنا بمسافة صغيرة و بدأت في السير و بدأ المطر في الهطول
طبعا لكم أن تتخيلوا مدى سعادتي
أكملت سيري منتشية فوجدت رجلا كبيرا يقول لي " يا ابنتي قفي تحت أي مكان يحميك حتى ينتهي المطر هكذا ستمرضين"
شعرت بإحراج شديد و لكني قلت له " المنزل ليس ببعيد" و أكملت سيري بسعادة
لا أحد يفهم كم أعشق المطر أستمتع جدا بقطرات المطر و هي تدق على رأسي و كأنها يد حانية تطرق أبواب عقلي ليفتح لها فتمحو ما به من هموم
أعشق ارتطام الأمطار بوجهي و كأنها سيل جارف يمسح ما بي من حزن و يقل لي أفيقي يا فتاة
أنا حديث عهد بالرحمن جئت أذكرك بأن الدنيا ذاهبة لا تستحق أن تحزني لأجلها
فسبحان من جعلني أحب المطر
فسبحان الله الذي أحيا بالمطر الأرض بعد موتها
سبحانك يا رازق الطير و خالق الشجر
سبحانك يا الله يا من أنزلت المطر

Saturday, April 5, 2008

في حب مصر

في حب مصر تقال العجائب
مهما يرى العقل الغرائب
الكل يعشق حاضر و غائب
و لبحر هواها القلب آيب
***
على أرض مصر قامت حضارات
جد و عمل دون شعارات
ضربت بالعلم أعظم آيات
أنارت نفوسا أضاءت ظلمات
***
في حضن مصر ارتمى العاشقين
جمال فريد من رب العالمين
نسوا بسحرها العمر الحزين
و عاد لعينهم جمال السنين
***
من أجل مصر يعمل مخلصون
نهارا و ليلا لا يملون
بحب و صبر يتفاعلون
ليعود الضياء لكل العيون
***
فهل يا مصر قريبا أراكِ
و قد عاد صبحا ينير محياكِ
و غرد طيراً حراً في سماكِ
يا مصر حفظكِ الله و حماكِ

و تركنا السلام يحترق

أعيني ابكيا بحرقة فاليوم قد قتل السلام
اليوم صرعت البراءة و اغتيلت كل الأحلام
فقد تركنا عدونا بغدره يهدم الآمال
و بأيدينا وضعنا حول أعناقنا الأغلال
اليوم رضينا لأنفسنا بأبشع ذل و هوان
و لن تمحى جريمتنا مهما مضى الزمان
فقد تركنا إخواننا بين أيدي الغادرين
و لم نتقي ربنا أو نستمع للواعظين
و نسينا أننا إخوان و أن التقوى و قودنا
و تركان حقنا يهان و أطماع الدنيا تقودنا
و الأعداء بين أهلنا هذا يغدر و هذا يخون
يقتلونهم يذبحونهم و يقولون إرهابيون
و نحن لا نفعل شيئا سوى التخاذل و الصمت
و العدو من حولنا يخمد لنا كل صوت
لا يريد أن يرانا إلا في هلاك كامل
و نحن نشجب و نندد بأسلحة الدمار الشامل
و الدمار سيأتينا لا بقنبلة أو لقاح
و لكن بتركنا واجبنا و اكتفائنا بالصياح
و شعوب عريقة تعاني من ظلمات الاحتلال
و غدر الغادرين بنا فاق كل الاحتمال
و نحن غير آبهين لقتل مبادئنا العريقة
و كل يوم يمر بنا يزيد جراحنا العميقة
إلى متى سيظل هذا و متى ينتهي ضعفنا؟
و كل الانتظار لماذا هل أعجبنا صمتنا؟
و لم عشقنا دنيانا و لصالح من نفترق؟
و كيف خذلنا إخواننا و تركنا السلام يحترق؟

بلادي

بلادي يا أحلى ما في الكون
فيك الحياة
على كل شكل و معنى و لون
و عشان عيونك
كل الصعب عليا يهون
نفسي تعودي زي زمان
يا ترى طلب مجنون؟
***
بلادي يا ساكنة جوايا
يا سبب جرحي و شقايا
كل أملي و منايا
ترجعي لينا البسمة
و يعود فرحي و هنايا
***
بلادي يا ساكنة في النني
أنا منك و إنت مني
عشانك أكتب و أغني
و أقول يا رب إرضى عني
***
بلادي أنا عمري ما أقصر
في حقك يا بدر منور
عن وشك الحلو بدور
و أقول سبحان من صور
***
بلادي إمتى أشوفك تاني
تتحقق فيك الأماني
و يظهر فيك صبح جميل
و يرجع ليكي عنواني