كان ياما كان
كان فيه زمان
طفل رقيق برئ
بيحلم بالأمان
و نفسه في الحنان
علشان يكمل
بيه الطريق
لكن ابوه دايما
يضربه
و بدل ما ياخده في حضنه
بيعذبه
و يقول ده كله علشان اربيه
و يكون راجل بصحيح
و كده كمان أنا هخليه
جامد و يقف في وش الريح
هو يعني علشان تربيه
لازم تكسره
ما يحسش بحبك ليه
و كمان تخسره
ربيه بالحنان
حسسه بالأمان
خليه يطلع فعلا انسان
بيحب الغير
يسعى في الخير
بدل ما نقول الخير و الأمان
ده كان زمان
ده كان زمان
*****
و آدي واحد غيره
لسه صغنون
علشان عيونه
الصعب يهون
لكن تلاقيه
الشغل مخليه
و كأنه جبال
أحزان و هموم
ساب مدرسته
قطعوا كراسته
ضاعت طفولته
راحت براءته
كلمه تعنفه
واحد يقرفه
عنف يسكته
ذل يموته
بيعيش أحزان
ذل و هوان
و ده كله عشان
ضاع الحنان
و بقينا نقول
ده كان زمان
ده كان زمان
*****
و قد ايه ده طفل جميل
لكن يا خسارة
حظه قليل
أهله حطوه
على الرصيف
و لوحده سابوه
لمصير مخيف
نواح و عويل
و برد الليل
و مطر الشتا
و حر الصيف
عصابات ياخدوه
و يشغلوه
و يمشي في طريق
آخره حريق
و يا إما كده يا يعذبوه
و إن قلنا حرام
يقولوا دي ظروف
طب ده اسمه كلام
تسيبوه للخوف
من غير لا حنان
ولا بر أمان
يردوا يقولوا
ده كان زمان
ده كان زمان
*****
و علشان أطفالنا
هم أملنا
و النور لبكره
عين على بكره
بتقول ليكم
لا للعنف
ضد الأطفال
ده مستحيل
يربي أجيال
ايديكم في ايدينا
نساعد بعضينا
نمدلهم ايدنا
نشيلهم في عنينا
و نحقق أمانينا
علشان بلدنا تتغير بينا
و بكده هنقول
دايما علطول
أولادنا اهما
نور الزمان
مش كان ياما كان
مش كان ياما كان
No comments:
Post a Comment